Иԥсҭазаара далҵит аԥсуа аҵарауаҩ ду, абызшәаҭҵааҩы, афилологиатә ҭҵаарадыррақәа рдоктор, апрофессор Шоҭа Арсҭаа.
Иване Џьавахишьвили ихьӡ зху Қарҭтәи Аҳәынҭқарратә университет Аԥсны аинститут аусуҩцәа Шоҭа Арсҭаа иуацәеи иҭынхацәеи аԥсуа жәлари ирыдашшылоит.
Шоҭа Ҟасҭеи-иԥа Арсҭаа диит Гәдоуҭа араион Оҭҳара ақыҭан, 1929 шықәсаз хәажәкыра 10 рзы. 1955 шықәсазы Қарҭтәи Аҳәынҭқарратә университет Афилологиатә факультет кавказтәи абызшәақәа рыҟәша далгеит, уи ашьҭахь, аҵара наигӡоит Қырҭтәылатәи ССР Аҭҵаарадыррақәа ракадемиа иаҵанакуаз абызшәадырра Аинститут аспирантураҿы. 1961 шықәсазы академик Қ.В. Ломҭаҭиӡе лнапхгарала ихьчеит акандидаттә диссертациа «Арлахәыра аԥсуа бызшәаҿы», 1986 шықәсазы ихьчеит адоктортә диссертациа. 1958 шықәса инаркны аус Абызшәеи, алитературеи, аҭоурыхи Аԥснытәи ринститут. Шоҭа Арсҭаа икьыԥхьхьан 40 инареиҳаны аҭҵаарадырратә усумҭақәа.
